Respirationis causas praesens hic sermo demonstrare constituit; neque enim respirationis hypothesim confirmare, neque eam impeditam aut omnino praeclusam emendare potest, qui causas ejus ignorat. Qui enim causam efficientem re vera deprehenderit, is demum solus tum laesionis differentiam, tum curandi modum cognoscet. Caeterum, ut rem rudi modo adumbremus, quum tres sint in genere respirationis causae, facultas voluntaria, instrumenta voluntati subservientia, et ad haec usus ipse, ob quem etiam prioribus causis opus habemus, usus sane principem inter respirationis causas locum obtinet, utpote qui innati caloris commoderationem conservat, et animalis spiritus substantiam nutrit. Voluntas vero disponit et velut ad rhythmum coaptat spirabiles actiones. Verum instrumentorum species multifida ac multiformis existit. Quaedam enim ad vectionem spiritus destinata sunt; quaedam aërem suscipiunt; quaedam vero ex eis ea, quae moventur, movent. Principium itaque est aër, qui per os et nares trahitur, materia existens utilitatis respirandi, bifariam partitus; et altera quidem minore sui parte per nares ad cerebrum defertur, altera vero majore per asperam arteriam in pulmonem devehitur. Atqui ipsa arteria organum vocis, via est respirationis. Pulmo vero, velut ventriculus profundus, spiritui destinatus est. Ejus autem dilatationem et contractionem thorax gubernat, qui musculis movetur, et ossibus dearticulatur. Quin et ipsum septum transversum respirationis organum est. Rotundius autem est, et in centro suo nervosum, circumcirca vero carnosum; sicut etiam circa costas musculi, qui quidem in mediis ipsorum regionibus existunt, duo et viginti numerantur, duo quidem primarum costarum, totidem etiam extremarum, et praeter hos tres ex collo utrinque provenientes, deinde hi septem, qui juxta spinam porrecti, et cum ipsis, qui circa abdomen consistunt, octo. Atque tot sane sunt musculi respirationi subservientes. Actiones autem sigillatim, septi quidem transversi, ut respirationem liberam faciat, eorum vero, qui circa costas sunt, ut thoracem exacte dilatent et contrahant. Qui quum duplices sint, externi expirationem, interni inspirationem perficiunt. Et primorum quidem duorum actio est, ut supernam tantum thoracis partem dilatent, extremorum vero, ut infernam ejus partem contrahant. Qui vero ex collo deveniunt, retrahunt simul et dilatant altas thoracis partes. Ex rectis vero circa collum musculis hi, qui ad claviculas extenduntur, fines cartilaginum, quae istic sunt, contrahunt, quemadmodum etiam hi, qui ad costarum in spina radices porriguntur. Qui demum circa abdomen sunt musculi, septi transversi sedes existentes, thoracis contractionem juvant. Quum itaque duo genera respirationum sint, libera et violenta, habeatque utraque ipsarum proprias partes duas, inspirationem videlicet et expirationem; fit, ut in totum quatuor sint respirationis partes. Caeterum in singulis his quatuor partibus propria quaedam instrumentorum natura est: liberae quidem inspirationis septum transversum, violentae vero tum musculus in simis scapularum situs, tum interna intercostalium pars; similiter autem et expirationis liberae quidem musculi circa abdomen, violentarviolentae vero externa intercostalium pars. Atque hoc quidem modo musculorum res se habet. Porro nervi duo, qui ad septum pertingunt, ex dearticulatione inter quartam et quintam colli vertebram progressi, in ipsam nervosam septi partem se inferunt; qui vero in musculos intercostales ex spina disperguntur, ad sternum deferuntur, non utique recti secundum longitudinem animantis extenti, neque, velut musculi, obliqui, sed transversim seruntur, caput habentes vertebram, finem vero sternum. Quin et qui in alios musculos respirationis opifices feruntur nervi, fere omnes ex spinali medulla nascuntur. Quare, quum tales et tot exiliant respirationis causae, manifestum vel penitus rudi existimo, qua in re singulae inter se distent. Voluntas equidem similis est equiti, qui habenarum motu equos impellit. Habenis autem similes sunt nervi, quemadmodum equis musculi. Sic vero et usus extremum respirationis votum est, quemadmodum victoria artis aurigandi.